My name is රයිටර් who writes, some kind of ඇවටියෙල් stories..

Wednesday, July 25, 2012

නග්න සිහිනය

සයන මත මුනින් තලාවී සිටි ඇයට හැඬුම්  නවත්වාගත නොහැකි විය. බොහෝ වෙලාවක් එක දිගට හැඬු නිසා සිහින් ඉකියක්ද පිටවිය. ඇයගේ කඳුළු කැට තදින් මුහුණට සිරවී තිබුණු කොට්ටයේ මසා තිබුණු තාරාවගේ රටා මැහුම මතින් කොට්ටයේ පුළුන් තෙත් කළේය. දකුනතිත් ඇඳ වියලද වමතින් ඇඳ ඇතිරිල්ලද තදින් අල්ලාගෙන සිටි ඇයගේ වම් අතේ මිරිකෙමින්වූ ඇඳ ඇතිරිල්ල හදිසියේම ආවේගයෙන් ගසා දමද්දී සයන මත වූ යමක් "ටොක්" හඬක් නගා බිම පතිත විය. ඇයට එය වගක් නොවීය. ඉරියව්වේ කිසි වෙනසකුදු නොකර පෙර පරිද්දෙන්ම වැතිර සිටියාය. වරින් වර උත්සන්න වන හැඬුම් නිසා ඇයගේ දෙවුර වේගයෙන් ඉහල පහල යයි. ඇය සිනාසේද එසේත් නැතිනම් හඬයිද යනුවෙන් ඇය දෙස පිටින් දකින්නෙකුට නිශ්චිතවම නිගමනය කල නොහැකිවිය. නමුත් ඒ මොහොතේ ඇය සත්‍ය වශයෙන්ම වැලපෙන බව දන්නේ ඇයම මිස ඇය පණමෙන් ආලය කල අයාචනවත් එපිට ලෝක වැසියාත් නොවේ. හදවතේ සෑම බිම් අඟලක්ම ඔහුගේ නමට ලියවෙද්දී, සිරුර පුරා ගලන ගලන ලේ බිඳුවකම ඔහු ජීවත් වෙත්දී සවනත වැකෙන  සියලු හඬ අභිබවා ඔහුගේ ආමන්ත්‍රණය පමණක්ම ඇසෙද්දී  ඇයට ඇගේ ජීවිතේ ඔහුම මිස වෙන අන් කිසිවෙක්වත් නොවිය. එනමුදු අද ?

පෙරදී ඇය බොහෝ ආශා කල ගීතයක් පසුබිමින් වැයෙන්නට  විය. නමුදු මෙවලේ එය ඇයට තවත් හිසරදයක් විය. නොනවත්වා ඇසෙන ගීතය තමන්ගේ ජංගම දුරකතනයට පැමිණි ඇමතුමක් බව හැඳින ගත් ඇය මුනින් තලාවී සිටියදීම හිස නොඋස්සාම වමතින් සයන මත අතපත ගාන්නට විය. එය සොයා ගැනීමට අපහසු වුයෙන් ඇය අපහසුවෙන් හිස ඔසවා විපරම් කළාය. සුළු මොහොතකට පෙර බිම පතිත වූ දුරකතනයට ආ ඇමතුම මීට සුළු මොහොතකට විසන්ධි වුවද යලිත් පැමිණි ඇමතුමක ලකුණු එහි තිරයේ සටහන් විය. අතට ගත් දුරකතනයට පැමිණි ඇමතුම ඇය විසන්ධි කර එය ඇඳ මතට නොසැලකිල්ලෙන් විසිකර යලි කොට්ට තුල මුහුණ සඟවා ගත්තාය. ගෙවෙන ගතවුණා වූ සෑම හෝරාවකම ඔහු සිහිනොවූ දිනයක් නොවීය. ඔහුගේ නිසල ඇස් දෙස කල්පයක් වුවද බලා සිටිය හැක. ඔහුගේ උණුසුමේ දෙඇස් වසාගෙන දැවටෙන්නට ඇයට වරු ගනන් ගෙවන්නට හැකිය. ඇසෙන නොඇසෙන හඬින් සවනත කොඳුරන බොළඳ කතා පොඩි එකෙක්ගේ මෙන් සොඳුරුය සුරතල්ය. එනමුදු අද විඳින්නේ කාගේ සුවඳද, කාගේ උණුහුමද?


නිතර නිතර ළමා ලපටියන්ගෙන් හඬින්, කෙලි කවටකමින් ප්‍රාණවත්ව ඔපවත්ව සතුට රැඳී උයනක් හදිසියේ වල්බිහිවුවක් වැනි හැඟීමක්, පාළුවක්, තනිකමක්,මෙන්ම දරාගත නොහැකි ලෝබ කමක් ඇයට දැනෙන්නට විය. ඔහු මතක් වෙන සෑම තප්පරයකදීම පපුව හෝස් ගා පත්තු වී යනවා ඇයට දැනුනි, වචනයෙක් විස්තර කල නොහි හිස්කමක් ඇයව වෙලාගනිද්දී එම වේදනාවම ඇය පිලිබඳ මහත් ආත්මානුකම්පාවක් දුකක් ඇති කළේය. ඇඳ අසල පිහිටි මේසයේ කුඩා හෝරා යන්ත්‍රයේ 1.30 සටහන් වී තිබුනේය. ගතවෙන්නේ මධ්‍යහ්නය නොවන බවත් රෑ මැදියම බවත් ඇයට වැටහිණි. ගෙවුණු හෝරාව කල්පයක් සේ දැනුනද ගතවුනේ හොරා කීපයක්  පමණක් බවත් ඇයට අවබෝධ වෙද්දී මින් මතුවට ඇය ජීවත්ව සිටින ඔහුගෙන් තොර ඉදිරි කාලය ගෙවා දමන්නේ කෙසේද යන්න අර්ථවිරහිත හැඟීමකින් ඇයගේ හිත මුළුමනින්ම පෙලනු ලැබීය. කඳුළු පිටාර ගලා ගිය කොපුල් තවමත් හරි හැටි වියලී ගොස් නැත. වරින් වර අලුත්වන කඳුළු නිසා එය තවමත් තෙතබරියම් වී තිබුණි. සයන මත උඩුබැලි අතට වැතිරී සිටි ඇයට ආයාචන පිලිබඳ පෙර අත් නොවිදි දුකක් දැනුනි. වරෙක ඔහුගේ පිළිරුව ජීවමානව ඇය ඉදිරිපස දිස්වන්නා සේ ඇයට හැඟුනි. එහෙත් ක්ෂණයෙන් අතුරුදන් වන ඡායාව ඇගේ දෙනුවන් අගට උණුහුම් කඳුළු කැට මිසක අන් කිසිවක් නොගෙනාවේය.  රෑ මැදියම පහුවෙත්දිත් නොනවත්වා හඬපු ඇයට  තවත් හඬන්නට ශක්තියක් නොවුනාසේම ගලන්නට කඳුළු ඇගේ දෙනෙත් තුල තවදුරටත් නොවීය. දුර්වල වූ නිසා හැඬුම් පිටට ගලා නොආවේය. නමුදු හෙට පීදෙන්නට තිබු  සුවඳවත් අරලිය පොහොට්ටුවක පෙති එය පිපෙන්නටත් මත්තෙන්ම ගිලිහුන කල්හි එය වැලපෙන්නේ කෙසේද එවැනිම හැඟීමක් ඇයගේ වතේ ශේෂව තිබුණි.   


"දැන් අඬලා වැලපිලා වැලපිලා වැඩක් නෑ අපර්ණා, හිත හදාගන්න බලන්න. වෙච්ච දේ වුනා, ඒ දේ උඹට මට තියා උඩ ඉන්න දෙයියන්ටවත් වෙනස් කරන්න බෑ. එක හින්ද දැන් හොඳ ළමයා වගේ නිදා ගන්න. මට දැන් ඔහේ එන්න පුළුවන් නම් මම එනවා. මේ රෑ මට එන්න විදිහක් නෑ. ඒත් එලිය වැටුණු ගමන් මමයි දෙවින්දියි උඹලගේ දිහා එනවා."


"හ්ම්..."

"කොච්චර අමාරු වුනත් යතාර්තයට අපිට මුණ දෙන්න වෙනවා...අපර්ණා. ඇත්ත කොච්චර කටුක වුනත්, දරාගන්න බැරි වුනත් ඒ දේට මුණ දෙන්නම වෙනවා. මේ මහා රෑ මම උඹට බණ කියනවා නෙමෙයි. අපිත් කැමතියි ඉස්සර හිනා වෙලා හිටිය අපර්ණා ඒ විදිහටම හිනාවෙලා ලස්සනට අපිත් එක්ක ඉන්නවා දකින්න. අපි හෙට උදේ එනකම් පරිස්සමෙන් ඉඳහන් හිතුවක්කාර තීරණහෙම ගන්නේ නැතුව.  එහෙනම් කෙල්ලේ මම තිබ්බ. බුදුසරණයි !"


"හ්ම්...බුදුසරණයි"


තම හිත මිතුරියන් යුතුකමක් වශයෙන්  තමන් ගැන විමසීමට ගන්නා ඇමතුම් නිසා ඇයට ඒවාට පිළිතුරු දී හෙම්බත් වී සිටියාය. අත රැඳී  දුරකථනය ක්‍රියා විරහිත කලත් එවිට ඔවුන් නිවසේ දුරකතනයට ගැනීමෙන් නිවැසියන්ගේ නින්දට බාධා වන නිසා ඇය එසේ නොකලාය.

එළිවෙන්නට තවත් හෝරා කීපයක්ම ගතවෙන්නට තිබෙද්දී ඇය නාන කාමරයට වැදුණාය. ගතලා සිටි ඇඳුම් පිටින්ම වතුර මල යටට වී කරාමය කැරකුවාය. එකෙනෙහිම ගෙමිදුල හරහා බොහෝ ඈතක සිට ගලාගෙන ආ සිහින් සීතල දිය බිඳිති වතුර මල මතින් ඇගේ හිසේ සිට පාදාන්තය දක්වා සැලී ඇයව නැහැවුවාය. හිත පුරා වාන්දමන සුසුම් සමග දෙනයන පතුලේ කොහේහෝ සිරවී තිබුණු  තවත් කඳුළු කැට කීපයක් සීතල දිය බිඳිති හා එක්ව ඇගේ වත සිපගෙනම අවසන් ගමන් ගියේය. ඇය බොහෝ වෙලාවක් වතුරමල යටට වී සිටියාය. ඔහුගේ සංසාරගත ආදරය ඇය සතුවූ මුල්ම දිනයේත් ඇය මෙසේම රෑ මැදියමේ වතුර මල යටට වී සතුටු කඳුළු වැගුරුවාය, ඔහුගේ ආදරය ඇවෙතින් සදහටම නොඑන ලෙස ගලා ගිය අද දිනයේත් එසේමය. සීතල දිය බිදිති පෙර පරිදිමය. නමුදු කොතරම් දේවල් කොයි තරම් වෙනසකට බඳුන් වී ඇත්දැයි ඇය කල්පනා කළාය.  


තෙත පිටින්ම කාමරය හරහා ගිය ඇය තෙත ඇඳුම් උනා දමා ඇඳුමක් දවටාගත්තාය. හැර දමා තිබු කවුළුව තුලින් කාමරය තුලට එන්නට පොරකන සුලන්, කවුළුවේ තිර රෙද්දක් සමග ඔට්ටුවිය. ඇය සෙමින් පියවර තබා කවුළුව වෙත ගොස් යකඩ ග්‍රීල්වල එල්ලී අපැහැදිලි කළුවර දෙස බලා සිටියාය. තමාගේ ජීවිතෙත් මේ කලුවරෙත් දැන් ඒහැටි වෙනසක් නැතිය යන සිතුවිල්ල ඇයගේ සිත වටා සක්මන් කළේය. එහෙමම බොහෝ වෙලාවක් සිටි ඇය නැවතත් සයන මතට පැමිණ දෑස පියා ගත්තාය. පුදුමයක තරම, නෙතු පියන ඇසිල්ලේදී වුවද ඔහුගේම රුව පමණක් නෙතුයට මැවෙන අපුරුව. ඇයට ඔහුත් ඔහුට ඇයත් පමණක්ම වූ නිසාවෙන් දෙසිත් බැඳී තිබුණු සෙනෙහසේ යදම් එතරම්ම ශක්තිමත් වූ නිසාවෙන් ඇයට ඔහුගෙන් තොර ලොවකුත් ඔහුට ඇයගෙන් තොර ලොවකුත් නොතිබිණ.  ඔහුගේ සුවඳවත් මතක සැමරුම් මැද පාන්දර පහේ පමණ සිට ඇයට නින්ද ගියාය. කිසි දිනෙක හැබැහින් දකින්නට අකමැති  යතාර්තයක් වූ  සිහිනය නිරුවත් වී ඇයට සරදම් කළේය.  


දුවේ.....දුවේ.......ළමයෝ... අපර්ණා......., නැගිටින්න පරක්කු වෙනවා. මළගෙදර යන්න, ඒ මිනිස්සු මොනවා නොහිතාවිද අපි ඊයේ රෑම එහෙ නාව එක ගැන. එක අතකට ඒ මිනිස්සුන්ටත් විකාර, කොහේ යන්නද මහා රෑ. ඒ පාරේ අපිට ඕනේ වෙලාවට වාහන තියනවයෑ. හා හා   ඉක්මනට නැගිටලා ලැස්ති වෙලා සුදු ඇඳුමක් ඇඳගන්න. ආයාචනගේ බොඩි එක ඊයේ රෑම ගෙනල්ල, වටේ පිටේ මිනිස්සු අහනවලු මොකෝ අපි පේන්න නැත්තේ කියල. හිතුමනාපේ තීරණ අරන් පස්සේ පසුතැවෙන්න වෙයි කියල අප්පච්චියි මමයි කොච්චර කිව්වද. අපේ ඕනේ කමට කැමැත්ත දුන්න නෙමෙයිනේ. උඹලා හොයාගෙනම කරගත්තුවනේ. දැන් ඉතින් පසුතැවිලා වැඩක් නෑ හිත හදා ගන්නවා ඇරෙන්න.


කටට ආදේවල් එලෙස නොහිතා පිට කලද තම ආදරණීය දියණියට අත්වූ ඉරණම පිළිබද ඇය සිටින්නේද  විස්සෝපයෙනි. දෛවය විසින් නග්න කරන ලද සිහිනක යතාර්ථය හමුවේ ඇයද ඇගේ දියණියද අසරණය. 

Sunday, July 15, 2012

චිත්‍රෙ අඳින්නේ මෙහෙමයිලු

පොරොන්දු වෙච්ච දෙයක් ඒ විදිහට ඉෂ්ට කරන්න පුළුවන් නම් ඒ දේ පොරොන්දු වෙච්ච කෙනාට වගේම පොරොන්දුව ගන්න කෙනාට ලොකු සතුටක්. ඒවගේම වෙච්ච පොරොන්දු හරියට ඉටු නොකලාම දෙපාර්ශවයටම ඇති වෙන්නේ දුකක්. පොරොන්දුව දුන්න කෙනාට කෙසේ වෙතත් පොරොන්දුව ගත්ත කෙනාට ඒක දුකක් වෙයි. මමත් ගිය පාර පොස්ට් එකෙන් පොරොන්දුවක් වුනානේ. ඉතින් මමත් ඒ වෙච්ච පොරොන්දුව ඉෂ්ට කරන්නයි හදන්නේ. මතකයිනේ. අර පෙළක් පොස්ට් වල යටින් මම දාපු චිත්‍ර අඳින්නේ කොහොමද කියන එක.  අපි හැමෝටම ජීවිතේ එක එක උණ හැදෙනවා, සමහරුන්ට කැම්පස් උණ, සමහරුන්ට නළු උණ, සමහරුන්ට ගායක උණ, ඔය විදිහට කට්ටියට ඒවා හැදෙනකොට මට හැදුනා ග්‍රැෆික් උණක්. ඉතින් මම එක හොඳ කරගන්න ගොඩක් දේවල් කරා ඒ වගේම ඉස්සරහටත් කරනවා. තවමත් අඩුවක් නෑ.

ඒ ග්‍රැෆික් චිත්‍ර අඳින්න මම පාවිච්චි කලේ ඇඩෝබි ඉලස්ට්‍රේටර් කියන මෘදුකාංගය. ඔන්න ඉතින් මචන්, දුවේ පුතේ දැන් ඉලස්ට්‍රේටර් තියන අය පටන් ගන්න නැති අයත් කොහෙන් හරි හොයාගෙන මේ විදිහට පොඩි ට්‍රයි එකක් දීල බලන්න. පත්තරවල පලවෙන කාටුන් අඳින්න, ඒවගේම ග්‍රැෆික් තොරතුරු ඉදිරිපත් කරන්න යොදාගන්නේ බහුල වශයෙන් මේ මෘදුකාංගය තමයි. සමහර විට ගොඩක් දෙනෙක් දන්නවා ඇති.


මේ ක්‍රමයට කියන්නේ "ට්‍රේස්" කරනවා කියල තමයි.
ඉස්සෙල්ලම මචන්, දුවේ පුතේ මෙහෙමයි. ඇඩෝබි ඉලස්ට්‍රේටර් මෘදුකාංගය Open  කරලා තමුන්ට කැමති ඒ කියන්නේ ට්‍රේස් කරන්න ඕනේ පින්තුරේ Open කරගන්න ඕනේ.


ඒක  කරන්න File --> Open යන්න . ඕපන් කරන පින්තුරේ රෙසුලුෂන් වැඩි එකක් නම් අඳින්න ගොඩක් පහසු වෙයි.


දැන් ඒ පින්තුරේ එහෙමම තියෙද්දී ලේයර් පැලට් එක හොයා ගන්න. පාත රූපේ තියෙන්නේ ඒ පැලට් එක තමයි. ඒක අහල පහලක පේන්න නැත්තම් අප්සෙට් යන්නේ නැතුව කෙලින්ම යන්න  Windows --> Layer ගිහිල්ල Layer කියන තැනට හරියක් දාන්න. ඔන්න දැන් ඒ රූපේ විදිහට පැලට් එකක් තියනවා.


(1) ලේයර් පැලට් එක


දැන් අපි අලුත් ලේයරයක් හදා ගන්න ඕනේ ඒක කරන්න පාත මං අංක ඒක දාල තියන අයිකන් ඒක උඩ ක්ලික් කරන්න.


(2)අලුත් ලේයර් එකක්



එතකොටම ඊට උඩින් Layer 2 කියල අලුත් ලේයර් එකක් හැදෙයි. දැන් ඊළඟට වැඩේ පටන් ගන්න කලින් කරන්න දේවල් ටිකක් තියනවා. ඒකට ඒ අලුතෙන් හැදුන Layer ඒක උඩ ක්ලික් කරගෙනම ඒක ඒ වෙනකොටත් කලින් තිබුන ලේයර් එකෙන් පහතට ඇදලා දාන්න.


(3) ලේයර් දෙක උඩ යට මාරු කරන්න


රුප සටහන් බලන්න. අංක 1 රුපයේ  Layer 2 තියන විදිහයි අංක 2 රුපයේ Layer 2 තියන විදිහයි. අන්න ඒ විදිහට ලේයර් දෙක උඩ යට මාරු කරන්න.

මීලඟට උඩින් තියන ලේයර් ඒක ලොක් කරගන්න ඕනේ පින්තුරේ පෙන්නලා තියන විදිහට ලේයර් ඒක ඉස්සරහින් තියන කොටුව ක්ලික් කලාම ඉබ්බෙක්ගේ ලකුණක් වැටෙනවා. ඒ කියන්නේ ඒ ලේයර් ඒක ලොක් කියන ඒක.


(4) ලේයර් ඒක ලොක් කරගන්න


ඔන්න අපි දැන් පින්තුරේ අඳින්නයි හදන්නේ. ඒකට අපි කරන්න ඕනේ මුලින්ම ලේයර් 2 (Layer 2) සිලෙක්ට් කරලා ඒ කියන්නේ ලේයර් පැලට් එකෙන් යට තියන ලේයර උඩ ඒක පාරක් ක්ලික් කලාම ඒක නිල් පාට වෙනවා. ඒ කියන්නේ ඒ ලේයරය සිලෙක්ට් වෙලා හොඳේ !


හරි...මීළඟට පෙන් ටූල් ඒක හොයා ගන්න ඕනේ මෙන්න එහෙනම් පෙන් ටූල් ඒක . එත් එක්කම අයිඩ්‍රෝපර් ටූල් එකත් බලාගන්නකෝ ඒක පස්සේ ඕනේ වෙනවා.    

(5) පෙන් ටූල් එක / අයිඩ්‍රෝපර් ටූල් එක



දැන් පෙන් ටූල් ඒක අරන් ඕපන් වෙලා තියන පින්තුරේ උඩ නිකන් ජොලියට වගේ ක්ලික් කරන්න පෙන් ටූල් එකට හුරු වෙන්න. පෙන් ටූල් ඒක වැඩ කරන්නේ කොහොමද  කියල අවබෝධයක් ලබා ගන්න පුළුවන් එතකොට.(මේක අපි කරන වැඩේට අදාළ නෑ. නමුත් සමහරුන්ට පෙන් ටූල් එකට හුරු වෙන්න ටිකක් වෙලා යනවා එක නිසා එහෙම පුරුදු වෙන එක ගොඩක් හොඳයි හරිය !!)


ඒ වුනාට මම කියල දෙන්නම් ඒ පෙන් ටූල් ඒක වැඩ කරන විදිහත්.


පාත රූපේ තියෙන්නේ ඒ විදිහට ක්ලික් කරාම ඇඳෙන කර්ව් එකක්.

.(6) පෙන් ටූල් ඒක වැඩ කරන විදිහ


දැන් අපි අර ඕපන් කරගත්ත පින්තුරේ තියන සෑම රේඛාවක්ම අරවිදිහට ඇඳගන්න ඕනේ.
අඳිනවා කියන්නේ මෙහෙමයි, සෑම වෙලාවකදීම පෙන් ටූල් එකෙන් අඳින සිලෙක්ෂන්
එකේ අග මුල (සංවෘර්ත) සම්බන්ධ වෙන්න ඕනේ. හරියට නිකන් අර ඉස්සර "MS PAINT" වලින් ඇඳීම වගේ වුනත් මේකේ එහෙම හරියටම ඕනේ නෑ. ඒකෙ පොඩි හිඩැසක් තිබුනොත් පින්තුරේට පාට දානකොට හත්පොලක ගෑවෙනවනේ. නමුත් නිර්මාණයේ සාර්ථකත්වයට සංවෘර්ත
වීම බලපාන හින්ද තමයි සංවෘර්ත කරන්න කියල කිවේ.


ඔන්න දැන් එහෙනම් අපි පින්තුරේ අඳින්නයි යන්නේ. කෝ දැන් ඔක්කොමල මවුස් එකට එක පාරක් වඳින්න මේ කරන වැඩේ සර්වප්‍රකාරයෙන් හරි යන්න කියල.  මොකද මවුස් එක  හසුරුවන එකෙන් තමයි වැඩේ වෙන්නේ. කෝ කෝ කෝ වඳින්න. ම්ම්.... හරි.... හරි.



මුලින්ම පින්තුරේ වටේ රේඛා ටික සම්පුර්ණ කරගත්තොත් වැඩේ ලේසියි, ඒ කියන්නේ අඳින්නේ මනුස්සයෙක්ගේ රුපයක්නම් ඒ රූපේ (මුණ) වටේ පෙන් ටූල් එකෙන් ඇඳගෙන මුනටම පොදු පාටක් දාගන්න එක ගොඩක් ලේසියි. පාට දාන විදිහ මම කියන්නම්

මම පින්තුර දාන එක ගොඩක් අඩුකරන්නේ මගේ කනෙක්ෂන් එක ස්ලෝව් හින්ද පබ්ලිෂ් කලාම මුළු පොස්ට් එකම මඤ්ඤං වෙන හින්ද හොඳේ.


රුපයේ තියන සෑම සියුම් අංගයක්ම ඇඳ ගත්තොත් තමයි නිර්මාණයේ ප්‍රතිපලය ලස්සන වෙන්නේ.
පහල තියෙන්නේ ඒ විදිහට ඇඳගත්ත  රූපේ.





(7) ඒ විදිහට ඇඳගත්ත  රූ.


ඇඳ ඇඳ පාට දාන්න ඕනේ. මෙන්න අඳින විදිහ. පාට යොදන විදිහ මම ඊළඟට කියන්නම්.  


දැන් ඔහොම ඇඳගත්ත සිලෙක්ෂන් එකට පාට දාන්න කී බෝඩ් ඒකෙ (I) අකුර ඔබන්න, නැත්තම් මම කලින් කීව eyedropper ටූල් එක සිලෙක්ට් කරන්න. මීලඟට අපි අන්දපු පින්තුරේ මුනට ක්ලික් කරන්න දැන් සැනින් ටූල් බාර් ඒකෙ (අර පෙන් ටූල් එක හෙම තියෙන්නේ) එක බොක්ස් එක අර සිලෙක්ට් කරපු පාට වැටෙයි. දැන් අපි ඒ පාට හරියට වැටිලා තියද කියල බලා ගන්න මෙන්න මේ පහත පින්තුරේ තියන ලකුණට ක්ලික් කරන්න, එවිටම ඔරිජිනල් පින්තුරේ හැංගිලා ඔයා
ඇඳපු සිලෙක්ෂන් එක පාට වැටිලා තියනවා පෙනේවි. 



(8) මේ  පින්තුරේ තියන ලකුණට ක්ලික් කරන්න




(9) ඉහත පින්තුරේ තියෙන්නේ මම ඇඳපු පින්තුරේ "ඇහැ" ඇඳලා පාට කරපු විදිහ  



ඔය විදිහට සම්පුර්ණ පින්තුරේ තියන සෑම සියුම් රේඛාවක්ම පෙන් ටූල් එකෙන් ඇඳලා අර විදිහට පාට දාපුහාම ලස්සන නිර්මානයක අයිතිකාරයෙක් වෙන්න පුළුවන්.


සමහර විට තේරුම් ගන්න ඇති. සමහර විට නොතේරෙන්නත් ඇති. තේරුන් නැති කෙනෙක් ඉන්නවනම් මාව ෆේස්බුක් එකෙන් හරි ඊ මේල් එකෙන් හරි සම්බන්ධ කරගත්තොත් උදව් කරන්නම්. 

පහත තියෙන්නේ ඒ විදිහට ඇඳපු නිර්මාණයේ සැලැස්මයි පාට දාල ඉවර කරපු නිර්මාණයයි.


(10) අර විදිහට ඇඳ ගත්තු රේඛා සියල්ලම



ඔරිජිනල් පින්තුරේ මුල් අයිතිය හා සම්පුර්ණ ගෞරවය එහි මුල් අයිතිකරු සතුය  

Thursday, July 5, 2012

පෙමට බඳින කවි




මේ සිහින සාගරේ
මායා දසුන් අතරේ
නිරතුරු රුවක් ඇඳුනේ
ඒ නුඹේ රුව ළඳුනේ

සිහින් ස්වරයෙන් සුසුමේ
නින්ද මගේ දුර ඇදුනේ
තුරුල් වී උර සයනේ
සිපගන්න කම්මුල් රහසේ

විඳගන්න ඔය සුවඳ රිසිසේ
තරු එක්ක මං එන්නම් සුළගේ
සඳ එක්ක නොගිහින් අහසේ
නවතින්න මං ලඟම මැණිකේ

 අද තරුවක් පායනවලු
හඳට වඩා එලිය තියන
වෙන සඳ තරු මොකටද මට
මගේ සුදු සඳ පායනකොට

සඳ පිනි කැට දියේ හොවා
ඒ සිසිලෙන් දෑත දොවා
නිම්හිම් නැති ලොවක් සොයා
ඇවිද යමුද හෙටක් පතා

නුඹ සිහිනෙන් දැකපු හීන
හෙට වෙනවා සැබෑ ඔන්න
සතුටු කඳුළු පිටකරන්න
ඇති වෙනකම් දැන් අඬන්න





ඉස්සර ලිව්ව කවි දෙකක් එකට යන හින්ද එකටම ලියල දැම්ම.
චිත්‍රෙත් ඉතින් අර මේනියාව ඔලුවට ගහල තිබ්බ කාලේ ඇන්ද එකක්.
ඔරිජිනල් පින්තුරේ නම් ගුගල් ලොක්කගෙන්.



[මේ විදිහට චිත්‍ර අඳින්න ආස අය ඉන්නවනම් කියන්නෝ..ඊළඟ පොස්ට් එකකින් කියල දෙන්නම්කො අඳින විදිහ, හරිය !!! ]