Sunday, November 13, 2016

දිදුලනා වූ තනි තරුව



ආලෝක වර්ෂ
දස දහස් ගණනක්
එහා හිඳ
දිදුලනා වූ
තනි තරුවක්ය
"
නුඹ" ...

ඉතිං,
සාධාරණය...!!!,
දිදුලමින් පැවතීමම මිස
අහසින් බැස අවුද
හදවතක නතර වීමට
සිත් පහළ නොවීම.
එහෙත් තාරකාවියනි...,

තරුවකට පැවරුණා වූ
සියලු කාරණා හැර,
තරුවක් විසින්
"
තේරුම් ගත යුතුව ඇති"
කාරණාද
අපමණක් තිබෙන්නට
පුළුවන් බව,
තාරකාවකට
නොවැටහීමම,
කොයි තරම් නම්
ශෝකජනකද...?

~ ඇස්ට්‍රොනට් රයිටර් ~

Saturday, November 12, 2016

මේ රාත්‍රිය



පැස්ටල් පෙට්ටියක,
වෛවර්ණ පාට කූරු
මුලින් ඉවර වූ පසු,
ඉතිරි වූ කළු කූරකින්
ළදරුවෙක් ඇඳි බලියකි,
මේ රාත්‍රිය...

දහ අටක් නැටුම් නටමින්
බත් කටක් කවන්නට වෙහෙසුණ,
දයාබර මව් අතින් ගිලිහුණු
හොදි පැල්ලමකි,
ඒ හඳ...

බිල්ලන්ට බය නැති
ඇට්ටර කිරි සිනා පොකුරකි,
තරු කිණිති වී තැන තැන
තිබෙන්නේ කටු කුරුටු මත...

තුරුළට ගෙන සිප සනසවන
ආදරේ දියවී සිසිලසද කැටිවුණ
මව් ළයින් නික්මුණු සුවඳකි
කුමුදු මලකින් හමන්නේ රෑට...

~ ලයින්ග් රයිටර් ~

Friday, November 11, 2016

දුවක් වී නම් ගෙදරක




බලාගෙනමයි
උන්නෙ මම
වරු ගාණක සිට,
එක දිගට ඔබ
මට හොරෙන්
හැඬූ වග...

වාවගන්නට බැරි
තැනකදී උපරිම,
නාඩන්න'යැයි
නොකියමි මැණික...

ගුලි කරන්
පපුවට ඔබ,
සිඹිමින් හඬන ගවුමම,
මං ගාවය තිබුණෙ,
ඩිංගිත්තකට පෙර...

වෙන්කර ගත
ඇහැකි නම්
පැහැදිලිව,
දකින්නට හැකිවෙයි ඔබටද,
හරියටම ඉන් අඩක්
මගෙත් කඳුළු වග...

හදා ගත යුතුව ඇත
මැණිකේ අපි, අපේ හිත,
දුවක් වී නම් ගෙදරක
යා යුතුවම ඇත දීගෙක...

~ සීක්‍රට්ලි ක්‍රයින්ග් රයිටර් ~

Thursday, November 10, 2016

බොල් පිළිමයක් මම.



ගරා වැටෙමින් තිබෙන
ශේෂ නටඹුන් අතර
කල්පයක්
නොනැසී පවතින
ශිලා පිළිමයකි
නුඹ...

වංකගිරි
කොදෙව්වක.
අගුළු ලු
බිහිදොරක් අස,
ප්‍රේමයෙන්
ජීවිතය අයදින
බොල් පිළිමයක්
මම...

~ එම්ප්ටි රයිටර් ~