My name is රයිටර් who writes, some kind of ඇවටියෙල් stories..

Friday, June 30, 2017

ම'පුතු






ගෙදර ටීපෝව වට
කුඩා යුද්ධයකි,
බත් පිඟානක් අතැතිව
පුතු පිටුපසින් ඔබ දිව යන,
මැරතන් තරඟයකි,

ගුලි කොට අනා ගත් බත් ගුලි
රැගෙන එන්නේ කුරුල්ලෙකි,
මුව අයාගත් ම'පුතුට බියවී
කොහේදෝ සැඟවෙන,
ගෝනි බිල්ලෙකි,

ආදරේ උතුරන
ඇස් හතරකට මැදිවී,
පාවී නිවී යයි මා දිවි
සරතැස් දුක්-දෝස සේදී

පුතු පිටු පසින්
දිව ගොස් බිම වාඩිවී,
බත් පිඩක් කවා ගන්නට
හිත ආශාවක් උපදී,

ආදරේ මට දැන්
නෙමේ නේදැ'යි කී,
මා මුව ගොතාගත්
බොරු අවනඩුවකි,

එසැණින් බත් පිඩක් විත්
'දෙතොල මත දියවේ,
තව එක් කටක් ඉල්ලුම
තරු ඇස් රැවුමකින් වැළැකේ


~ මැරිඩ් රයිටර් ~

Thursday, June 29, 2017

"තද දුඹුරු" ඇස්




දකිනු රිසියෙන්
බිමට බරවුන,
ශෝකයෙන්
ඇළලුණු
"
තද දුඹුරු" ඇස්,

හිතයි මට අද
ඔබව රිදවන්නට,
මවාගෙන මුහුණට
බොරු අමනාපයක්...
"රහ නෑ කෑම අද...!"

සැලෙන සසැලෙන
දෙතොල තදකර,
හාරමිනි එකෙණෙහි
පයැඟිල්ලකින්
ගෙබිම ඔබ...

පමාවී තව
මදක් කල් ගෙන,
වහා පැන එමි
ඔබේ තුරුළට,

පෙර සැලැස්මෙහි
සිතාගෙන
සිටි පරිදි,
කඳුළු ගුලි පිරි
දෑස් පෙති මත
ඉනික්බිති මෘදු
හාදුවක් රඳවමි,

~ ප්‍රීටෙන්ඩඩ් රයිටර් ~

Tuesday, June 27, 2017

මුතු මැණිකේ





ගොම මැටි අතුල
ගෙබිම සාලය මැද,
හැපී හැඬවෙනු ඇසෙයි
පයක බැඳි ගිගිර ඔබ,

සියුමැලිම අංශුව තෙක්
පෙරා රෑ හඳ එළිය,
පොල් අතු වහළයෙන්
වෙන් වෙයි,

නුරා හිස් අහස් මායිම,
නිවී යායුතු බැවින් තව
සුළු මොහොතකින් ඉක්බිති,
මැළැවුණු මුහුණකිනි පහනක්
ඉපැරණි ලී කනප්පුව මත,

සියක් වර දොවා හිස
සීතල උල්පත් ගඟුල් දිය,
ගැල්වූ සඳුන් පුසුඹක් හමා එයි,
කුටියේ දොර සීමාව බිඳ,

"ඉවසුම්" පවුර පාමුල විසිර
බිඳෙමින් සිටි අතරතුර සිත,
දොර උළුවස්සෙන්ය මැවුණේ
මුතු මැණිකේ ඔබේ රුව.

~ කවුන්ටින්ග් රයිටර් ~