මොනාශා

දඩබ්බර මොනාශා,
බොහෝ කලකට
පසුවදී අමතමි...

තවමත් මැකී නොගියාවූ
ඔබේ දඟකාර නිය පහර කෑ දෑතෙහි,
සුවපත් වූ සීරුම්
හදිසියේ ඇස ගැටුණාවෙන් ලියමි...

මතුපිටින් සුවපත් වූ කැළලි
ඇතුලාන්තයෙන් පෑරීම,
ලියන්නට තරම් වටිනා
කාරණාවක් නොවන බැව් හඟිමි...

නැවත ලියලන්නට
ලදළු ප්‍රේමයක් ඉතිරිව
නොවනා නියාවෙන්,
හැකි පරිදි, හැකි ඉක්මනින්
අවසාන සුවඳ බිඳුවත්
රැගෙන යන මෙන් ඉල්ලමි...

~ රික්වෙස්ටින්ග් රයිටර් ~

ඔබ තෝරා ගත් හදවත

ඔබ තෝරාගෙන ඇත්තේ
කර්කශම හදවතකි
මතුපිට හිමාලේපිත
ඇතුළතින් ගිණි
පුළිඟු නළියන
තෙතක් කියා කිසි
දෙයක් නැති
රළු පරළුම හිතකි..

එනිසාවෙන් ඔබට,
හඬන්නට සිදු වූ කලෙක
උරපතක් මත හිස හොවා
තුරුළෙහි සනසවන
ලෙංගතු දෑතක් පිළිබඳව
සුබ සිහින නොදකින්න..

~ ටෆ් රයිටර් ~

පළමු හමුවීමකට සුදානම් වීම

ඔබ හිතනා තරම්
පහසු නැත,
පළමු හමුවීමකට
සුදානම් වීම...

කල්පයක් හිත
රැඳෙනු පිණිස,
සිහි තබා ගත යුතුව ඇත
එකදු බැල්මක්වත්
මග නොහැර...

වෙන්වී යන්නට
සිදුවූ දාක අපිට,
යළි යලිත් සිහිකර
හඬන්නට දෙයක්
සන්තකව විය යුතුය..

මරණ මංචය මත
හෙළනා දිනක
අවසාන සුසුම,
සිහි කැඳවා ගත
යුතුව ඇත
ඉතාමත් පැහැදිලිව,
පළමු හමුවීම දා
ඔබගේ මුහුණ...

එහෙයින් සොඳුර
ඒ පළමු හමුවීමට
සූදානම් වීම,
ඔබ කියනා තරම්
පහසු නැත...

~ බැක්පැක්ඩ් රයිටර් ~

ගිණි නිවාලන පහනක්

ශීත බිඳු දිය

බිඳිති බේරෙන

ඔබේ පිට මැද

කුඩා දිය ඇල්ලක්...

සලිත වී සියොළඟ

සිපගනිමි එකිනෙක

පිපුණු හීගඩු යායක්...

මැණික, ඔබ

දැල්වී දැල්වී

ලසෝ ගිණි

නිවාලන පහනක්

~ මෙල්ටඩ් රයිටර් ~

කිරි අත්තා

වැහි ඇල්ලකින් පසු
පුරන් වූ යාය කෙලවර,
රුක්අත්තන මලක්
හිනැහෙයි,
කිරි අත්තාගේ
සොහොන පාමුල...

උදැල්ලක පහසක්
කල්පෙකින්
නොවිඳිනා
පොළොවක්,
අදත් හඬගා කියයි
අත්තා,
හුස්ම ගනිමින්
හිඳිනා වගක්...

~ බ්‍රීත්ලස් රයිටර් ~