ම'පුතු

ගෙදර ටීපෝව වට
කුඩා යුද්ධයකි,
බත් පිඟානක් අතැතිව
පුතු පිටුපසින් ඔබ දිව යන,
මැරතන් තරඟයකි,

ගුලි කොට අනා ගත් බත් ගුලි
රැගෙන එන්නේ කුරුල්ලෙකි,
මුව අයාගත් ම'පුතුට බියවී
කොහේදෝ සැඟවෙන,
ගෝනි බිල්ලෙකි,

ආදරේ උතුරන
ඇස් හතරකට මැදිවී,
පාවී නිවී යයි මා දිවි
සරතැස් දුක්-දෝස සේදී

පුතු පිටු පසින්
දිව ගොස් බිම වාඩිවී,
බත් පිඩක් කවා ගන්නට
හිත ආශාවක් උපදී,

ආදරේ මට දැන්
නෙමේ නේදැ'යි කී,
මා මුව ගොතාගත්
බොරු අවනඩුවකි,

එසැණින් බත් පිඩක් විත්
ම'දෙතොල මත දියවේ,
තව එක් කටක් ඉල්ලුම
තරු ඇස් රැවුමකින් වැළැකේ

~ මැරිඩ් රයිටර් ~