දිගු ඉතිහාස

ඉතා කෙටි පෙම්
කතාවකට වුව
මහා දිගු
ඉතිහාසයක්
තිබිය හැක

~ හිස්ටොරික් රයිටර් ~

ඔබ නොමැති බොහෝ දිගු දවස්

ඔබ නොමැති
බොහෝ දිගු
දවස්වල
මට කියාදෙන
එක්තරා
පාඩමක් ඇත

කොයි දේ
කොයි විදිහට
වුණත් හෙට,
නුඹ නොමැති
දිනක් ගැන
මා සිහිනෙන්වත්
සිතා නැත

~ අන්ඩ්‍රීම්ඩ් රයිටර් ~

සොහොන් මල්

කොතෙක්
මල් පිපුණද
සොහොන් වට,
මල් වත්තක්
වන්නට
නොහැක
කනත්තට

~ ගොස්ට් රයිටර් ~

රහස් කතා

දින පොතේ
හිම පාට
පිටු අතර පමණක්
රහසේම
හුස්ම ගන්නා,
"කිසිවෙකුට"
කිව නොහැකි
කතා කාටත්
තිබෙන්නට
පුළුවන...

එනමුත් ප්‍රියාවිය,
මා සතු එවන්
පොත්වල
"කිසිවෙකුටත්"
කියන තැන
"නුඔත් ඇතුළුව" කියා
මම කොහේවත්
කියා නැත...

~ අන්ටෝල්ඩ් රයිටර් ~

ළපටි උණ පඳුරු

ළපටි
උණ පඳුරු දරුවන්,
තදින් වැළඳගෙන හිඳිති
වෙසක් මාසෙට
මව් උණ පඳුරු
වැඩියෙන්

~ ග්‍රිප්ඩ් රයිටර් ~

අහිමි වන්නේ කොතැනත්

සුමුදු මුදු ඇඟිලි
තුඩගින් නෙලුවද
තියුණු දැති
සැතකින් සිඳුවද
අහිමි වන්නේ
කොතැනත්
නටුවකට
මලමය...

~ ඩිප්‍රිව්ඩ් රයිටර් ~

වැරදිකාර නිවැරදි මම

දෙතොල් ඉම කරා
පැමිණෙනු අවැසිව
ස්වරාල සීමාවට ඔබ්බෙන්
සමූල ඝාතනයට ලක්වූ
සියලු චිත්ත සන්තානයන්හි
කෲරතම මරණවලට
වගකිව යුතු වැරදිකාර
නිවැරදි කෙනෙක් වේ නම්
ඒ ආයාසයෙන් මැඩගත්
ස්වකීය හෘද සාක්ෂියය...

~ ජෙනොසයිඩඩ් රයිටර් ~

යටගියාවක සුවඳ

එකී යටගියාවක
ප්‍රේමයෙහි සුවඳ
තවම ඉතිරිව
ඇත්නම්,
ඒ ඇත්තේ
උද්‍යාන බංකුව
මතය....
අපි ඇවිද ගිය
මාවත් දෙපසය..
දවා අළුකල
සමරු සැමරුම්
සිහිවටන තුළය...

~ නිව්බෝ(ර්)න් රයිටර් ~